Dumadagundong ang kulog;
At matalim na kidlat;
Sa nangingitim na ulap sa kalangitan.
Sa bulahaw nang Inang hinahanap ang mga anak;
Sabay hablot nang mga sinampay at nakakulang damit.
Aninag nang mga paslit;
Ang naaanod na baha;
Sa dagsa nang ulan;
Gumuguho ang kalsada nupnop sa maghapon;
Mga matang nakasungaw sa bintanang;
Inaabangan ang taong naglalakad sa putikan.
Nakapanpan ang mukhang tanging pandong;
Ay salukot at kalapyaw;
May akay akay na kalabaw.
Nakahalukipkip ang Ama kong giniginaw;
Sa pagpihit nang ubod na iniiihaw;
Nakatupang mga nguso;
Tinatakam ang ulam na inabraw;
Pagsapit nang gabing malalim;
Merong nagngangalit nang ipin sa pag idlip;
May nagkakamot sa kagat nang surot;
Nararamdaman ang ihip nang hanging masungit;
Halos matuklap ang atip;
Matinig na kalansing nang tabo at timba;
Nakasahod sa tulo nang ulan;
Tagos sa aming higaan.
Sa tagiktik nang arinolang may umiihi;
Sa aming pandinig ay parang musikang nag uugoy
Sa pagtulog;
Katabi ang matapang na amoy nang usok nang katol;
Masahol pa sa kagat nang lamok;
Tangi ang boses ni Tiya Dely;
Ang nagpapaantok.
Sa pagbalikwas;
Papunta sa malayong kasilyas;
Sinasamahan nang Kuyang takot sa amat;
Nakapinid sa isang sulok;
Animo kakaripas;
Baka merong nakasulyap;
Sa may nuno nang punso;
Matanda pa sa aming bunso.
Ang aming bahay;
May batalan kung tawagin;
Aming paliguan o kusina na rin;
May tapayang tubigan;
Kung hindi ka maingat ay baka mabuslot;
Sa mga uwang na pagitan;
Sa pusali baka ikaw ay madampot.
Sa aming pagkain;
Magpatulo nang tubig ang aming gawain;
Baka merong mabikig;
Ang utos nang Ina namin;
Ilatag mo ang banig!
Hindi naman itinataboy ang manliligaw;
Sakali lang kung umangat sa kinauupuan;
Kuwentuhang di mapuknit ang libangan.
Nakakabit man ang kulambo;
At ang ilaw ay malamlam;
Tuloy pa rin ang kuwentuhan at ngisngisan;
Inaabot nang karimlan.
Sa kukusap kusap na punong alitaptap;
May bakod na punong tinik;
May barulong ang aming silong;
May bayuhan nang nilubyan;
May alaga kaming asong si "Rigiding";
Ang munispyo at pulis;
Ang bilaong may kakanin;
May nagngangakngak sa hagdanan;
May kalbong bata at galisan;
Namuhay na kasing pait nang ampalayang ligaw;
Kasingtamis din nang sinuklob ang pumukaw.

Wrote by: Genoveva Circa Barcelo Regehr
July 11 2008
Dedicated to our Mother's 81st Birthday, Anacleta Circa
Barcelo: A Poet and a Baker